حشاشين و جواسيس و بلطجيه و شعب مغيب

لما قتل خالد سعيد, الشرطه قالت عليه انه بتاع مخدرات, و كلنا عارفين ان المخدرات بتتباع في الاقسام بمعرفه امناء الشرطه, و كلنا عارفين ان اغلب رجال الشرطه بياخدوا من الاحراز بتاعه المخدرات و بيظبطوا نفسهم, و انا عن نفسي بشوف عساكر الشرطه علي القهاوي بيلفوا سجاير الله اعلم حشيش ولا بانجو.

و لما قامت الثورة حسني بيه و الاربعين حرامي قالولنا ان الميدان فيه جواسيس و عملاء, و بعد كده عرفنا ان هم اللي عملاء و هم اللي جواسيس, بعد كشف المراسلات و الاوراق بينهم و بين الدول الاخري .

و دلوقتي بيقولولنا ان اللي في الميدان بلطجيه, و ان اللي بيحرق و بيكسر هم اللي في الميدان, ياتري اللي بيقولولنا هيطلعوا زي اللي سبقوهم ولا ايه النظام ؟

الغريبه بجد ان المصريين عارفين كويس جدا مين البلطجي و مين العميل و مين بتاع المخدرات و لكن الغالبيه العامه من المصريين مبقوش بيتصرفوا بناءا علي معرفتهم و لكن بناءا علي رسائل مسمومه ترسل عبر وسائل الاعلام, و كأننا شعب مغيب و غير واعي لما يدور حوله كل همه هو الاستقرار اللحظي.

و كل ما تكلم حد يقولك الاقتصاد و البورصه و انبوبه البوتاجاز, و ده نوع تاني من الرسائل المسمومه اللي بيرسلها النظام الي كل بيت مصري و هو ان أمنك الغذائي و المالي مهدد بسبب ولاد التيت اللي في التحرير, طب هو كل حاجه بتقف لمجرد ان في ناس معتصمه في التحرير , و كل الاقتصاد بتعنا بيتعطل لمجرد ان في مظاهرات.

كلام اهبل لا يصدقه عاقل يملك بصيره, لو ان النظام يعرف ان هذا الشعب يملك ما يكفي من البصيره لما صدر له هذه الرسائل المسمومه , و لان هذا النظام هو الراعي الرسمي لنشر التخلف في المجتمع المصري فهو متأكد من مدي اللاوعي المنتشر في المجتمع و من مدي فاعليه رسائله المسمومه الي الشعب المصري و الاهم من  ده اننا مش بنلاقي حد يتكسف لما يطلع يكذب عيني عينك في مؤتمر صحفي اقل ما يقال عنه انه فقره كوميديه.

و انا مش بتهم الشعب المصري بالجهل او بفقد البصيره و لكن انا ملاحظ ان كل الناس ماشيه علي نغمه الشعب المصري هو افضل شعب و انه واعي جدا و انه و انه و كلام جميل جدا .... اعتقد اننا محتاجين نفوق شويه من الوهم ده لاننا لو فضلنا كده عمرنا ما هنحل مشاكلنا و علشان نقدر نحل مشاكلنا لازم نعرفها كويس و نحددها و نتعامل معاها بحجمها الطبيعي و اهم مشكله هتواجه اي مشروع نهضه في مصر هو سلبيه الشعب المصري و كسله في طلب الحق و وقف الظلم.

اصعب حاجه علي كل مصري دلوقتي هي انه يقول للغلطان انت غلط في وشه و قدام الناس.