بقلم يحيي أحمد
لو سمحتوا بلاش نحكم علي الامور دلوقتي
في حاجات كتير حصلت خلال الايام اللي فاتت بيحصل فيها تحقيق قانوني اعتقد اننا لازم ننتظر التحقيقات هتظهر ايه الاول
ثانيا لازم كلنا نعرف ان مفيش حاجه ببلاش كلنا لازم ندفع ثمن حريتنا و ثمن التغيير اللي لازم ندفعه انه يعمل علي تقدم مصر علميا و اقتصاديا و اجتماعيا
لازم مننساش احنا كنا عاملين ازاي قبل 25 يناير لازم نشوف ايه الايجابيات اللي حققناها
لازم كلنا نسأل و نحاول نفهم ايه اللي وصلنا للي احنا فيه دلوقتي و ساعتها هنعرف مين اللي فينا خاين و مين اللي فينا عميل
و لكت طبيعي جدا اني لما اسمع للاستاذ العظيم الفظيع اسامه سرايا الاقيه بعتبرني عميل
و طبيعي لما اسمع البرادعي بيتكلم عن البلطجيه اللي اقتحموا التحرير انهم خونه و عملاء
و لازم هنا اقول اني دلوقتي مختلف مع البرادعي علشان محدش يفتخر اني بدافع عنه او عن وجهات نظره
ولكن صوت العقل بيقول ان دلوقتي اصبح هناك تغيير يحدث علي الارض المصريه و اعتقد انه لا يمكن لاي مؤسسه مصريه ان تخفي عننا حقيقه ما يحدث من فوضي
بلاش نتشتت يا جماعه لازم كلنا نكون ببساطه مع التغيير السلمي و ضد الفوضي مع الحريه و ضد المؤمرات
بالظبط زي ما كنا يوم 25 و 28 يناير و 1 فبراير
كلنا كنا بنطلب حقوقنا بالتظاهر السلمي المتحضر
و انا فخور اني شاركت في يوم 28 يناير
اليوم اللي وصلنا صوتنا بكل قوه لقصر الرئاسه
اليوم اللي واجهنا فيه كل جبروت الامن بكل ما استطاع من سبل قمعيه
اليوم اللي اطلقنا فيه رصاص الحناجر علي التوريث و كانت يطلق علينا رصاص حي
اليوم اللي اطلقنا فيه قنابل الحناجر علي دوله الفرد المستبد و كانت تطلق علينا قنابل الغازات المسيله للدموع
انا مش عميل و انا مش خاين لاني شاركت في ثوره الحريه
انا مش عميل و مش خاين لاني عاوز بلدي تبقي احسن بلد في الدنيا
انا مش عميل ولا خاين لاني عاوز بنتي تتجوز راجل متعلم مثقف و بيشتغل
انا مش عميل و خاين لاني عاوز اعبر عن رأي في مبارك و حكمه و حكومته او غيرهم
انا مش عميل ولا خاين
و لكن اكيد هيجي يوم تتكشف فيه الحقيقه
و اللي هتكشف كل عميل و خاين بيحاول بجهض مولد مصر الحديثه
و بيحاول يصورني و يصور كل مصري كان في المظاهرات انه مش فاهم ابعاد اللي بيعمله او انه عاوز البلد تبقي فوضي
اتمني ان كل اللي بيقول الكلام ده ان يحدثني عن هذه الامور بعد رحيل مبارك و حاشيته اللي وصلونا لما نحن فيه
كل واحد مننا ليه رأي في اللي بيحصل ده أكيد
و لكن لو سمحت خلي في اعتبارك ان مفيش مصري راضي عن اللي بيحصل
و بلاش الكلام بتاع التلفزيون المصري اللي هو دول خونه دول مندسين و دول مش فاهمين و الكلام ده
و اتمني من ابواق النظام اللي علي شاكله عبد الله كمال و ممتاز القط و كرم جبر و اسامه سرايه ان يرحمونا من تخوين المصريين او البعض منهم
و شكرا
مصري و فخور بمصريتي اكثر من اي وقت مضي
1 comment:
بصراحة انت قلت كل اللي بفكر فيه وخصوصا بعد مناقشات مع اشخاص اخرين حسسسوني بجد اني مش وطنية وبكره البلد ومش عاوزة اصلاح وكل اللي عاوزاه تخريب وان الدنيا خربت بعد المظاهرات ولان المظاهرات لسه مستمرة.على الرغم من اني مقتنعة جدا باللي بيحصل وان كل تغيير له ضحاياه ومش علشان حاولو يروعوا الناس ويحسسوهم انهم من غير النظام الحالي حياتهم هتدمر.لكن للاسف في ناس كتير اتأثرت في المضوع ده وتعبوا جدا وخصوصا المسئولين عن أسر.انا بدافع عن رايي علشان ابنى لما يجي للحياه يلاقي وسط كويس متحضر لو غلط يتعاقب ولو ليه حق يعرف ياخده
Post a Comment