بقلم: يحيي أحمد
لما تمشي عكسي علشان احنا في ثورة
لما تمشي عكسي علشان احنا في ثورة
لما تشتري استيكر مكتوب عليه 25 يناير و تلزقه مكان نمر العربيه
لما تشيل نمر عربيتك و تمشي من غير نمر خالص
لما ترمي منديل بعد ما استعملته في الشارع اللي شباب الشارع نظفوه
لما تشارك في مظاهرة فئويه و توقف خدمات بتتقدم للمصريين و فاكر انك بتشارك في الثورة
لما تبذل كل جهدك لجمع السباب و توجيهه للرئيس السابق و الموالين ليه
لما تعتقد ان كل صاحب رأي مختلف عن رأيك انه متخلف و انه بيدمر مصر
لما تعمل حاجه من الحاجات اللي فاتت دي يبقي اسمحلي اقولك انك بتشارك و بشكل فعال و ايجابي الي اقصي درجه في تدعيم الفوضي الهدامه و تخريب المجتمع المصري و الاخطر من ده كله ان حضرتك بالسلوكيات دي و غيرها مش جزء من الثورة
لان الثورة دلوقتي محتاجه كل واحد مننا اكتر من اي وقت تاني و دور كل واحد مننا اهم و اخطر من الوقت اللي فات قبل كده كان يكفي من كل بيت يشارك واحد انما دلوقتي لازم كل فرد يشارك
لان مفيش اسهل من هدم نظام فاسد و ظالم و مستبد و لكن مفيش اصعب من بناء مجتمع ايجابي و مثقف و حر و مفيش اصعب من البناء علي اسس سليمه
لو سمحت راجع نفسك و تحمل مسؤوليه انك مصري
شارك في بناء مصر الحريه و التقدم و العلم و الأخلاق الراقيه
زي ما حققنا المستحيل بهدم نظام مبارك في الوقت اللي كان الكل بيصفنا فيه بالسلبيه و عدم الانتماء لمصر
نقدر نثور علي السلبيه و الانحطاط الأخلاقي
No comments:
Post a Comment